Kaskazini mwa Burkina Faso kumekumbwa na mashambulizi mawili tofauti ya kigaidi kwenye vijiji na kusababisha vifo vya takriban raia 44, kulingana na mamlaka. Gavana Rodolphe Sorgho aliwalaumu magaidi kwa mashambulizi hayo bila kutaja kundi maalum na kutoa rambirambi zake kwa familia za waliouawa na salamu za heri kwa waliojeruhiwa.
Habari chache kuhusu mashambulizi hayo kwa sasa, lakini mkazi mmoja wa kijiji hicho aliripoti kwamba "idadi kubwa ya magaidi" walishambulia kijiji chao Alhamisi usiku, huku milio ya risasi ikiendelea usiku kucha. Burkina Faso, mojawapo ya nchi masikini zaidi duniani, imekuwa sehemu kubwa ya ghasia za wanamgambo wa Kiislamu wanaohusishwa na makundi kama vile al-Qaeda na Islamic State.
Ghasia hizo awali zilianza katika nchi jirani ya Mali mwaka 2012 lakini tangu wakati huo zimeenea katika eneo lote la Sahel kusini mwa Jangwa la Sahara. Tangu mwaka wa 2018, maeneo makubwa ya kaskazini na mashariki mwa Burkina Faso hayatawalika, na kusababisha mamilioni ya watu kuyakimbia makazi yao kutokana na hofu ya kuvamiwa zaidi na watu wenye silaha ambao mara kwa mara hushambulia jamii za vijijini kwa pikipiki. Maelfu ya watu wameuawa katika eneo hilo.