Mwanamke mmoja wa Thailand ambaye alikamatwa kwa tuhuma za kumuua rafiki yake kwa kutumia sianidi sasa ameshtakiwa kwa angalau makosa 13 ya mauaji ya kukusudia, polisi nchini Thailand wamethibitisha. Sararat Rangsiwuthaporn alikamatwa wiki iliyopita kwa madai ya kumuua Siriporn Kanwong, lakini polisi sasa wameomba hati za kukamatwa katika kesi 14 za madai ya mauaji yanayomhusisha Sararat, huku 13 zikiidhinishwa na mahakama hadi sasa na moja bado haijashughulikiwa. Wahasiriwa wote walikula au kunywa na Sararat katika kipindi cha vifo vyao. Marehemu wote 14, pamoja na mmoja aliyenusurika, walitiwa sumu ya sianidi.
Sararat ambaye ni mjamzito amekanusha tuhuma hizo na kwa sasa yuko rumande. Polisi pia wanamchunguza mpenzi wake, Witoon Rangsiwuthaporn, afisa mkuu wa polisi ambaye alikuwa na cheo cha Lt. Kanali. Witoon amefutwa kazi kama naibu mkuu wa polisi wa eneo hilo na anakabiliwa na mashtaka ya ulaghai na ubadhirifu unaohusiana na madai ya mauaji.
Mauaji ya mfululizo ni nadra sana nchini Thailand, na uchunguzi wa mauaji mengi umeibadilisha nchi hiyo. Polisi wanaamini kuwa mauaji hayo huenda yalikuwa na nia ya kifedha, huku wahasiriwa wakidaiwa kumkopesha Sararat pesa wakati wa kukaribia vifo vyao. Deni la watumiaji ni tatizo kubwa nchini Thailand, likichukua karibu 90% ya Pato la Taifa kufikia 2022, kulingana na Benki ya Thailand.