Wall Street Journal hisobotiga ko'ra, Netflix Gollivud aktyorlarining ish tashlashi yakunlanganidan keyin reklamasiz striming xizmati narxini oshirishni rejalashtirmoqda. Yangilik Netflix aksiyalarining 3 foizdan ko‘proq o‘sishiga sabab bo‘ldi.
Hisobotda aytilishicha, Netflix butun dunyo boʻylab bir nechta bozorlarda narxlarni oshirishni koʻrib chiqmoqda, ammo bu AQSh va Kanadadan boshlanishi mumkin. Biroq, taklif qilinayotgan narx oshishiga oid aniq tafsilotlar, masalan, miqdor yoki aniq muddatlar hozircha oshkor etilmagan.
Ta'kidlash joizki, SAG-AFTRA aktyorlar uyushmasi va kinostudiyalar vakili bo'lgan Kino va televidenie prodyuserlari alyansi (AMPTP) o'rtasidagi muzokaralar hali ham davom etmoqda. Ikki tomon chorshanba kuni yana uchrashishi rejalashtirilgan. Yozuvchilar uyushmasi besh oylik muvaffaqiyatsiz muzokaralardan so‘ng yaqinda AMPTP bilan taxminiy kelishuvga erishdi.
Netflix shu yil boshida ayrim mamlakatlarda obuna rejalari narxlarini pasaytirgan edi. Bundan tashqari, striming kompaniyasi o'z abonentlari o'rtasida parol almashishga qarshi kurash choralarini amalga oshirdi. Ushbu tashabbuslar may oyida 100 dan ortiq mamlakatlarda amalga oshirildi.
Netflix Wall Street Journal hisobotiga izoh berishdan bosh tortdi. Aktyorlar uyushmasi va studiyalar o‘rtasidagi muzokaralar davom etar ekan, Netflix o‘z narxlarini qachon va qanchaga oshirishi ma’lum bo‘ladi.