Korea Kaskazini imedai kufanikiwa kuifanyia majaribio ndege isiyo na rubani ya chini ya maji iliyopewa jina la "Haeil-2 Unmanned Underwater Nuclear Attack Boat" ambayo inadaiwa kuwa na uwezo wa kubeba kichwa cha nyuklia. Kulingana na Shirika la Habari la Serikali la Korea (KCNA), ndege hiyo isiyo na rubani ilijaribiwa katika pwani ya mashariki ya Korea Kaskazini na kusafirishwa kwa zaidi ya saa 71 kabla ya kichwa cha majaribio kulipuliwa chini ya maji.
Hii ni mara ya pili katika wiki kadhaa kwa Korea Kaskazini kudai kufanya majaribio ndege isiyo na rubani yenye uwezo wa nyuklia, baada ya kutangaza jaribio la Haeil-1 mwezi Machi. Hata hivyo wachambuzi wametilia shaka madai hayo wakisema kuwa Korea Kaskazini ina historia ya kutia chumvi uwezo wake.