Viongozi wa Afrika Magharibi wameelezea utayari wao wa kutumia nguvu ikibidi kurejesha demokrasia nchini Niger, huku kukiwa na maandamano makubwa ya kuwaunga mkono viongozi wa mapinduzi nje ya Ubalozi wa Ufaransa nchini humo. Siku ya Jumapili, Jumuiya ya Kiuchumi ya Nchi za Afrika Magharibi (ECOWAS) iliiwekea Niger vikwazo vingi vya kiuchumi na kidiplomasia, na kuwapa viongozi wa kijeshi wiki moja kumrejesha madarakani Rais aliyeondolewa madarakani Mohamed Bazoum.
Hapo awali, maelfu ya watu walikusanyika nje ya Ubalozi wa Ufaransa katika mji mkuu wa Niger, Niamey, kuonyesha uungaji mkono wao kwa serikali ya kijeshi. Kulingana na video na mashuhuda, mlango ulichomwa moto wakati wa maandamano. Katika kujibu hilo, Ufaransa, ambayo ni mkoloni wa zamani wa Niger, ilitoa taarifa ikionya kwamba italipiza kisasi iwapo raia wake yeyote angeshambuliwa.
ECOWAS, muungano wa nchi 15 wanachama, pia imechukua hatua kali dhidi ya Niger. Jumuiya hiyo imefunga mipaka ya anga na ardhi na nchi, kugandisha mali zake katika benki kuu ya kanda, na kufungia mali za serikali katika benki za biashara, kati ya hatua zingine. Hata hivyo, serikali ya kijeshi imeionya ECOWAS dhidi ya uingiliaji wowote wa kijeshi kumrejesha madarakani Rais Bazoum.
Kiongozi wa mapinduzi hayo Jenerali Abdourahamane Tiani alijitangaza kuwa kiongozi mpya wa nchi hiyo Ijumaa iliyopita baada ya kumweka kizuizini Rais Bazoum. Hili limezua shutuma za kimataifa, huku Umoja wa Ulaya na Ufaransa zikitangaza kusitisha msaada kwa Niger, mojawapo ya nchi maskini zaidi duniani.
Niger imekuwa mshirika mkuu wa EU na Marekani katika vita dhidi ya wanajihadi katika eneo hilo, ikipokea karibu dola bilioni 2 za misaada ya kila mwaka ya maendeleo. Ufaransa, ambayo inahifadhi wanajeshi 1,500 nchini Niger, ilisitisha msaada wa Euro milioni 120 (dola milioni 132) mwaka jana. EU imetoa euro milioni 503 katika misaada ya maendeleo kutoka 2021-2024 lakini sasa imetangaza kusitisha mara moja msaada wa bajeti na ushirikiano wa usalama.
Marekani pia imeibua wasiwasi, huku Waziri wa Mambo ya Nje Antony Blinken akisema kwamba usaidizi wa usalama na maendeleo wa Marekani kwa Niger sasa "uko hatarini. "Niger imeonekana kama mshirika wa kutegemewa wa nchi za Magharibi katika ukanda wa Sahel wa Afrika usio na utulivu wa kisiasa na kiuchumi. Ufaransa na Marekani zina kambi za kijeshi nchini humo ili kupambana na makundi ya wanajihadi, huku Umoja wa Ulaya ukiiona Niger kama mshirika muhimu katika kushughulikia uhamiaji haramu kutoka Afrika.
Mapinduzi nchini Niger yameunda ukanda wa nchi zinazosimamiwa na jeshi kuanzia Bahari ya Atlantiki hadi Bahari Nyekundu. Nyingi za nchi hizi zina uhusiano wa karibu na Urusi kuliko na Magharibi. Ushawishi wa Urusi katika eneo hilo umeongezeka katika miaka ya hivi karibuni, kwa sehemu kupitia shughuli za Kikundi cha Wagner. Waandamanaji nchini Niger walionekana wakiwa wamebeba bendera zenye mistari wima ya buluu-nyeupe-nyekundu inayofanana na bendera ya Urusi, wakilaani Ufaransa, Marekani na Umoja wa Afrika huku wakitoa wito wa kuungwa mkono na Urusi.
Katika juhudi za kutatua mgogoro huo, mtawala wa kijeshi wa Chad na Rais wa mpito Mahamat Deby Itno aliripotiwa kuwa mjini Niamey siku ya Jumapili.